فلح وململ الانتخابات بقلم إسعاد يونس... بالمصرى اليوم

■ الثلاثة كانوا ناويين يشتغلونها. ■ الأول: اللواء عمر سليمان.. منذ أسبوعين وجهت لك هذه الرسالة «خيراً فعل السيد عمر سليمان بانسحابه من السباق الرئاسى.. ماكانتش حاتمشى علينا أبداً.. مش معقول راجل كاشف دفاتر وملفات البلد كلها من ٩٣ يبقى رئيسها فجأة.. لقد كان على علم بكل مفاسد النظام وكل سوءاته.. وبما أنه لم يستقل وقتها أو يعلن امتعاضه.. فبالتالى لا يصح أن يرأس الثوار الذين أسقطوا هذا النظام.. اعتذاره يئد فكرة أنه كان المرشح المدعوم من المجلس العسكرى».. تقوم تقرر تنزل تانى؟؟.. وبالبيريهات الحمرا؟؟.. بقى معقول الرجل الذى كان على رأس واحد من أقوى أجهزة المخابرات فى العالم بشهادة أعدائه يكون بهذا المستوى المتواضع من الذكاء؟؟.. تتحرق مرتين فى شهور يا راجل؟؟.. مرتين؟؟.. وكل مرة فيهم تضرب حريق السويس على عينه؟؟.. الحمد لله إن جهاز المخابرات لم ولن يتأثر بهذا الحريق المعنوى.. برضه رجالته أمثال محسن ممتاز لسه بخيرهم ومستعدون لفداء الوطن وحمايته من أعدائه الخارجيين.. مازلت لا أفهم جتلك منين الفكرة اللوذعية دى.. اعتمدت على فكرة إن الناس طهقت من التيار الإسلامى فقلت أدخل أقش بقى.. وقلنا وقتها إن تلبية هذه الرغبة تفكير قاصر.. فنحن لا نريد إقصاء أحد.. صحيح طلعوا عينين أهالينا لكن ليس المطلوب هو عودتهم إلى السجون.. مش حل مطلقاً.. إحنا بقى الليبراليين الكفرة الملاحدة لا نهدف إلى إعدام الناس ولا اعتقالهم.. نتمنى أن يعمل الكل لصالح الوطن.. واذا اتعوج بنعرف نعدله بس بالعقل.. مش بالسجن والنفخ والنار. ■ الثانى، خيرت الشاطر.. قالك الكاريزما شرط مهم لقيادة الناس.. الكاريزما.. القَبول يعنى.. وقالك الكاريزما عطية من الله.. لا تُشترى ولا تُقترض ولاَّ تُفتعل.. الواحد لو وقف فى المراية يقدر يعرف ربنا منّ عليه بكاريزما والاَّ حرمه منها حرمان نهائى.. وقالك رئيس الجمهورية مطلوب منه يبقى حدوة.. قصدى قدوة.. يعنى زوجة واحدة وعيلين تلاتة بالكتير.. مش أربع زوجات وعشرة أبناء وستاشر حفيد.. ويكون عنده مشروع حضارى يتعلق بالعلم والاقتصاد العالمى والتكنولوجيا.. مش نهضة سوبرماركتية قوامها الجبنة والحلاوة وأزياء المحجبات.. وقالك رئيس الجمهورية يعتبر رأس الدولة.. فإذا انحنى رأس الدولة، ليقبل يد أى حد مؤتمراً بأوامره، يبقى الدولة كلها حاتنزل بوس فى إيد الحد ده.. ويبقى طقس قومى بقى.. رئيس الوزرا يبوس.. والوزرا والمجلس يبوسوا.. والشعب كله يبوس.. وعلى المقيمين خارجها إرسال البوس عبر البريد الإلكترونى.. واللى مش حايبوس حايتعلق.. ويعتبر خرج على ولى الأمر.. وتبقى الثورة اللى جاية.. مش حانبوس.. هو يبوس.. بس ف بيتهم. ■ الثالث: حازم أبوإسماعيل.. يعنى معقولة يا عم الحاج اللى انت عامله ده؟؟.. تعرف يا عم الحاج.. إيفوريا العظمة خلتك نسيت حاجة مهمة قوى.. مادمت جمعت الحبة الحلوين اللى حواليك دول كان لازم تفكر قبل ما تدخل معركة خاسرة زى باظابورت الوالدة الله يرحمها.. لو كنت من أول ثانية اعترفت ومن قبل ما تواجه بهذه الحقيقة التى تتعارض مع المادة تمانية وعشرين اللى زيطتولها جامد قوى وكفرتونا كلنا عشانها دى.. عارفة إننا فكرناكوا بيها وعايرناكوا كتير.. لكن الحقيقة أنا واللى زيى مش مسامحين أبداً فى تكفيرنا.. مش مسامحين فى الناااااااااعااااااام بتاعتكوا دى.. مش مسامحين فى تضليل الناس باستخدام حبة الدعاة اللى هددونا بأن اللى حايقول لأ يروح يعيش فى كندا وأمريكا.. طلعنا إحنا اللى مصاروة وغيرنا هو اللى من أمريكا.. بقولك نسيت إنك لو كنت من أول ثانية قلت يا جماعة أنا مامتى إمريكانية.. لكنى أتمنى إعطائى الفرصة لخدمة بلدى بتغيير هذه المادة أو بالتغاضى عنها أو أى حاجة من دى.. كنت حصلت على مباركة الناس وسميت «الصادق الأمين» تيمناً بالرسول الغالى الصادق.. الراجل.. الراجل.. النبى بتاعنا عليه أفضل الصلاة كان راجل.. لا يكذب ولا يتجمل ولا يجعل الزيجزاج خط سيره.. ولا بيفتى فى البيبس ولا ميزانية إسرائيل ولا استيراد عشرين مليون سيارة فى السنة ولا مخزون الدهب بتاع المصريين اللى افترضت إنه رقم وطلع مُنتج مناجم الذهب على الكرة الأرضية منذ بدء الخليقة مايجيبش تلته.. المعلومات يا سيدى تحصل من الكتب مش من مجلة ميكى. عايزة أسألك سؤال: لو كنت بقيت رئيس الجمهورية بمنطقك وسلوكك ده.. وجه واحد معارض ليك ولم شوية ناس قاللهم أنا المهدى المنتظر.. واعتصمولك قدام لجانك ومحاكمك وهددوا بالويل والثبور وعظائم الأمور.. كنت حاتسيبه؟؟.. والاَّ كنت حاتستعين بقوات جيشك وبوليسك وتنشهم كلهم؟؟.. تبيدهم عن بكرة أبيهم بصفتهم أعداء الإسلام الكفار؟؟.. أو أعداءك أنت شخصياً بصفتك شايف نفسك رمز الإسلام.. على أى حال انت تشكر.. فقد أضفت كثيراً من الفلح والململ والبهارات إلى مولد الانتخابات الرئاسية.. وتأكد أننا سنكون معك وخلفك وبنهتف بحياتك عندما تكسب قضية التعويض التى سترفعها على أمريكا وأجهزتها عقاباً لها على تزوير أوراق الوالدة.. أما الآن.. فجيم أوفر بقى.. مش فاضيين.. فيه ناس واقفة نيكست. ■ السيد فضيلة المرشد العام لجماعة الإخوان المسلمين التى مازالت محظورة.. لقب فضيلة المرشد يضفى بهاء وجلالاً على حامله.. ويضعه فى مصاف البشر أصحاب الصفاء النفسى والهدف الدعوى الجميل.. أنا شخصياً لم أفهم حضرتك واقف ليه فى المؤتمر الصحفى لتعلن لأبناء الوطن نزول السيد خيرت الشاطر مرشحاً محتملاً لرئاسة الجمهورية جنباً إلى جنب مع السيد محمد مرسى.. لم أفهم بأى صفة.. هو مش نازل عن الحزب المعلن الحرية والعدالة؟؟.. هو حضرتك رئيس الحزب؟؟.. والاَّ مرشد الجماعة التى مازالت غير معلنة ومحظورة؟؟.. هو مش إحنا الشعب؟؟.. مش لازم نفهم مين اللى بيكلمنا وصفته إيه؟؟.. والاَّ هو فرض أمر واقع واحنا وذكاوتنا بقى؟؟.. ثم تعلن أنه حدثت متغيرات.. وبلاها «الشاطر» خدوا «مرسى».. هو أى حاجة وخلاص؟؟.. زى ما نكون احنا واقفين ميتين قوى على باب الحزب وبنهتف إدونا رئيس.. أى رئيس من عندكوا ينوبكوا ثواب.. أى حد نفك بيه زنقة رئاسة. يا فضيلة المرشد العام.. مكانك أرقى وأرفع من كل هذا.. عد إلى حيث يفرض عليك الواجب الدعوى.. وقم بعمل الخير ونشر السلام بين جماعتك.. فإذا أردت أن تخرج إلى الشعب لتجرى معه حواراً عقلانياً.. قم بسحب مرشح الحزب السيد «مرسى»: بدل ما تحرقوا الراجل بدون مناسبة هو كمان. ■ سؤال إلى كل المرشحين.. مسموح نشوف سيدة مصر الأولى اللى جاية والاَّ حرام؟؟ ■ نويت أصلى صلاة العصر فى الصالة.. يووه نويت أصلى صلاة العصر فى الأوضة وبعدين أقول بعلو حسى إنى صليت.. لا لا لا.. نويت أصلى صلاة العصر فى البلكونة.. لا الجو وحش.. نويت أصلى صلاة العصر قدام البلكونة وهى مفتوحة عشان الجيران يشوفونى.. يا دى النيلة.. نويت أصلى صلاة العصر قدام باب الشقة والطيار بيجيب الدليفيرى عشان ينزل الشارع يقولهم إنى مؤمنة فيحلوا عن سما اللى خلفونى.. يانهار أزرق.. والنبى يارب ما تخللى حد يدخل بينى وبينك.. أنا قربت أنسى اللى اتعلمته.