اخبط راسك فى الحيط.. إنت مصرى بقلم إسعاد يونس بالمصرى اليوم

■ تيكيلام تيكيلام.. إيه يا عم؟.. مالك جاى تجرى كده زى القطر اللى فوّت المحطة؟.. حاتدهسنى يا أخى.. إنت لسّه قاعد؟.. الجرس ضرب ياللا قوم.. ليه عندنا إيه دلوقتى؟.. عندنا تقسيم اللجان.. قوم ياللا بسرعة.. طب استنى حاخلص الشوليكة دى وجاى.. شوليكة إيه إنت طالع القرافة؟.. قوم بسرعة.. عبال ماتمضغ وتبلع تكون اللجنة اللى عينك عليها اتلهطت منك.. هما قسّموا من ورانا ولاّ إيه؟.. الله أعلم حاكم الواحد بيتدير كده يلاقى الاستجواب اتشقط وطلب الإحاطة اتدشت.. بابقى قايل للجماعة فى البيت إنى طالع أزعّق فى الجلسة عشان يشوفونى فى التيفيسيون ما بلحقش.. ده حتى سعادة الداكتور كل ماجى انطق يقوللى اجلس.. حاتنّى جالس كده طول الخمس سنين؟.. مش حارفع راسى وسط الحتة أبدا؟.. أقول إيه للحاجة أمى؟.. ماخبيش عليك وانا نازل النهارده قالتلى منى عينى يا ابن بطنى أشوفك قايم زى الزعزوعة كده وعاملك منظر فى مجلس العرب اللى بتروحه ده.. قوم بقى.. طب استنى أغسل إيديا.. أصل كت بلحّس الشوليك بمفتّقة.. لأ لأ تعالى بتلزيقتك.. مش فارقة كتير يعنى. ■ بقولك إيه.. إيه؟.. هات ودنك عشان محدش يسمعنا.. أها.. ودنك مش دقنك يا أخى.. الشعر دخل ف بقى.. ما هى دى ودنى يا غبى.. يا حليلة إنت إزاى مربى شعر ودنك كده؟.. قوللى إنت حتاخد نيهوون؟.. مش عارف.. إنت حتاخد نيهييين.. أنا عايز دوكهيا.. لأ لأ دوكهيا منشن عليها دوكهوما.. إيهيه؟.. ودهوت حياخد إيه؟.. دهوت قاعد ومجصعن فوق دوكها.. إمممممممممم.. ودولم حايكوشوا عالباقى.. إمممم.. التعليم والا الصحة؟.. النقل والا الإسكان؟.. الدستورية والا الصناعة؟.. لا والنبى سيبلى الدستورية.. شيمعنى يعنى؟.. أصل أنا داخل وحالف لاغشلقها.. ودستور ياسيادى بقى.. اقفل المحبس من المنور تقطع المية عن الجيهة كلها.. آه يا لئيم.. عندك التعليم والصحة ولو خبت خالص بقى تبقى السئاافة.. أعوذ بالله.. سئافة إيه؟.. ده فيها سيما وقباحة وعرى وفجور وقلة حيا.. انت عايزنى آخد لجنة م اللى حايتجاب ضلفهم؟.. أقعد أعمل إيه بقى فى المجلس ساعتها؟.. يوووه يادى الحيرة.. حادى بادى حادى بادى سيدى محمد البغدادى.. شالوا وحطوا كله على دى.. كيرى كيرى كيرى.. كيرى كيرى إيه؟.. إنت بتزغزغنى؟.. يابنى شاور عالليستة مش على باطى.. ده إيه الفلح ده؟.. شوف ياسيدى .. أنا حااااااااااخد.. حااااااااااااخد.. يه يه يه يه.. مالهم هجموا كده.. أعوذ بالله من غضب الله.. أهى طارت الصناعة.. ■ خد لجنة القوى العاملة.. عاملة إيه ووجع دماغ إيه.. وعمال واعتصامات ووقفات احتجاجية وهم ما يتلم.. لا ياعم.. أنا عايز الإدارة المحلية.. أهى دى عايزة حد ما بيفهمش الألف من رجل البنطلون.. إدينى وحياة والدك النقل.. محدش حياخد النقل غيرى.. طب تاخد العلاقات الخارجية.. لا ياعم دى فيها والعياذ بالله رطن بالإنجليزى وناس مش متوضية.. خليها للبهوات اللى بيتنططوا بتوع الخراطيش دول.. مش جايلنا منهم غير وجع الدماغ والسياح.. انت اتهبلت؟.. دول يتوئدوا هنا جوّه المجلس.. ما يتكشفوش على أجانب أبدا.. بكره نعوز نظبّط شغل مع الخواجات هنا والا هنا وإنت معاك ابتدائية قديمة وبتفك خط والعياذ بالله شمال.. سيبك منهم دول ينطولنا فيها ويزيطوا بقى خصوصا الواد أبونضارة الفرقع لوز ده.. على قولك دول واكلينا فى البرامج خالص.. أنا مابقاش حد بيعزمنى أطلع أتكلم فى التيفيسيون نوهائى.. بقالنا حبة ما شديناش كارت رعب ولا ضلمناها عالسياحة والبورصة.. ولا نكدنا عالمواطنين أكتر ماهم متنكدين.. تعبان يا ناس تعبان.. خدت عالأضواء خلاص.. مش قادر.. عايز أطلع أخبطلى تصريح م اللى بيجيبوا جاز دول. ■ باااااس يا جماعة.. فكوا الزحمة دى شوية.. عشان ما نختلفش ونتخانق وريحتنا تطلع بره للكلاب بتوع الإعلام.. أنا لقيت حل.. اعملوا دايرة.. مدوا إيديكوا قدام.. كلوا بامية.. القطة العامية.. ادينى الحق المستحق البيلى بيلى باه.. هيه.. أنا خدت الصناعة.. ■ إيه الظلم ده؟.. ترصصنا كلنا وتضحك علينا وتاخد الصناعة وتجرى.. واحنا ناخد إيه؟.. البامية؟.. والله معرفش بقى مع احترامى لكلام سعادتك.. كل واحد يشوف مصلحته.. يعنى هو انت بتفهم فى الصناعة؟.. يعنى هو فيه حد فيكوا بيفهم ف أى حاجة أصلا؟.. المهم إن كله بما لا يخالف شرع الله.. ونعم بالله.. ■ وسع إنت وهو.. أنا قديم هنا وكلمتى لازم تتسمع.. أنا أختار الأول وانتوا من بعدى.. إوحوا من وشى يا كماحة.. أصلا اتديروا عشان ما تبصوش.. ماحبش حد يبصلى ف لجنتى.. انا حاغمّى عينيا.. افتّح مالاقيكوش.. ليه ؟.. إحنا حانلعب المسّاكة؟.. مابلاش خفافة وظرافة.. إنت حاتنكت فى حرم المجلس؟.. ياللا اتديروا.. ■ خلاص؟.. اتديرتوا؟.. لأ لسه.. خلاويص؟.. لسه.. خلاص إحنا بعدنا خالص خد راحتك بقى.. واحد اتنين تلاتة كارونى كارونيتا.. سقفولى سقفة وأنا أنط النطة.. هه.. هه.. هه.. وآدى الإسكان.. ■ والله عال.. عال خالص.. عال جدا.. كل ده بيحصل من ورايا؟.. من إمتى؟.. إنتوا مش عارفين إنى فيها لاخفيها؟.. يا متآمرين يا مُحرّضين.. أنا معايا مستندات وتسجيلات وفيديوهات تودى كل واحد فيكوا ورا الكازوزة.. لقد كنت شاهدا عيانا على كل أفعالكم.. كنت فى الميدان وخارجه.. رجلون جوه ورجلون بره.. كده دولارات كده إسترلينى.. وأنا أطالب باللجنة التى اتفقت وتوالست عليها مع أقرانى.. ومحدش يسألنى أقرانى مين.. اللى حايبوسنى الأول حايبقى هو أقرانى وابن والدى وراضع معايا من بيبيرونة واحدة.. هيييييييييييه.. هات بوسة خدو.. وأنا أنا بوسة بوقو.. إدينى حضنك يا فننس.. فليحيا هنّص ويسقط كل ريبرارى عميل. ■ عزيزى المواطن المحبط.. اخبط راسك فى الحيط.. إنت مصرى..