بخخخخخخخخخ.. ظوربرايظ بقلم إسعاد يونس ٢١/ ٩/ ٢٠١٢ بالمصرى اليوم

---

■ فى الغرب يجرى تقليد اجتماعى اسمه «سوربرايز بارتى» أى «حفلة بخخخخ».. فإذا ما أرادت مجموعة من الكائنات الاحتفال بعيد ميلاد واحد منهم.. يشتروا هدايا ويسرّبوه من بيته ويدخلوه من وراه عشان يزينوا البيت ويخبوا الهدايا.. وأحيانا أخرى يحطوله خوازيق وزحاليق وغرا سايح كنوع من التمهيد الاحتفائى بيه وهو داخل.. ويطفوا النور ويستخبوا.. يدخل أخينا بيته فى الضلمة بسلامة نية فيتزحلق زحلوقة طويلة يلبس ف آخرها فزنقور الحيطة أو تتغرى رجليه فى الأرض فييجى يتحرك يقوم مقلوب على وشه أو يقع عليه جردل بوية خضرا من فوق سن الباب يلبس فى زعزوعة دماغه.. كل هذا فى محاولات طائشة للوصول إلى زرّ النور.. وقبل ما يوصل بهسّة صغيرة يقوموا مولعين كل نور البيت فعينيه تضلّم م الخضة.. ويقوموا زاعقين فى أم صرصور ودنه بفرحة غلاوية مبالغ فيها «سوربرايز» أى «بخخخخخخ».. ويقوموا مزقلينه بالهدايا ويفرقعوا البلالين والبمب جوه بُقه فيصاب بخليط من الفرحة والهبالة فى آن واحد.. وقد يودع عهد الخلفة إلى الأبد.. هو وحظه الأغبر بقى.. ■ عندنا.. وبما أننا أحيانا نحب ننقل م الغرب دون فهم أو ترجمة.. نقلنا مؤخرا هذا الطقس الحضارى المذهل.. هما استخبولنا جوه البيت ولبسونا فى الحيط ودلقوا علينا جردل البوية وغرّوا رجلينا فى الأرض وحلقولنا زلبطة ودهنوا قرعتنا بعسل اسود وطلقوا البراغيت ومارسوا كل ألوان الفكاهات المحببة للنفس دى.. وضلّموا الدنيا واستخبولنا فى الدرة.. فاضل إجراء واحد بس.. يطلعوا علينا يسرعونا ويصرخوا فى جزل وحبور «بخخخخخخ.. ظوربرايظ» ويقوموا هابدينا بالدستور الجديد على نافوخنا.. فنموت بالسكتة القلبية قبل ما نسأل هو جواه إيه.. ويبقى قتل خطأ بغرض البخخخخخ.. ■ ويبدو أنه.. والله أعلم طبعا.. يوجد فى الدستور مادة بتقولك «يجوز للفتاة فى سن التاسعة أن تتزوج».. يعنى هى حاتروح لابوها وهى ماسكة المصاصة وعمالة تطلع لسانها فى المراية تشوفه إحمرّ ولاَّ لسه.. وبتهرش ف دماغها وامها بتزعقلها وتقولها «ميت مرة قلتلك ماتهرشيش دماغك وإنتى مش غاسلة إيدك لا ييجى بيبة فشعرك».. وتقوله أنا عقدت العزم يا والدى على الزواج.. وأننى هنا ومن فوق هذه العجلة بتلاتة أناشدكم الموافقة على هذا الزواج.. فهو يتنحنح ويقعر فى صوته بوقار ويقولها «يجوز».. ■ طيب وبصرف النظر عن رأى المجلس القومى للمرأة اللى مش عارفين مين اللى ماسكه ولا بيعملوا إيه.. بما أنكم مصرون إصرارا شنيعا منيعا فظيعا على هذه المادة.. مفيش مانع تجوزوها فى سن التاسعة.. بس على شرط إن العريس مايعديش اتناشر سنة بحد أقصى.. عشان يبقى لعب العيال متبادل.. ويروحوا المدرسة ويلعبوا الحجلة والمسّاكة سوا وكده.. وممنوع منعا باتا أن يكون عِجل عنده خمسين سبعين سنة يعانى من شعور بالعجز الجنسى وعايز يجدد شبابه بعيلة قد ركبته لكى يمارس معها جريمة اغتصاب الأطفال تحت مظلة قانونية وعقد بيع وشراء.. لإن ده معناه كلام كتير قوى يورد معاه ألفاظ مش مؤدبة م اللى بتطلع فى أحاديث السادة الرداحين الجدد اللى انطلقوا علينا زى بخاخة التوكسافين.. وبالمرة نبقى اتنقلنا نقلة حضارية أو قل قفزة سبايدرمانية جبارة نحو الخلف، حيث تعيش القبائل البدائية لكى نتأسى بهم بدلا من أن نأخذ بأيديهم للأمام.. واقترح بالمرة إننا استكمالا للتأسى ده نكمل الطقس الصحراوى ونخرج لنقضى حاجتنا فى الصحراء مستعينين بالزلط الملون وبلاها شبكات الصرف الصحى والمصاريف ووجع القلب.. ■ طبعاً ستنكر جميع الأجهزة مسؤوليتها عن جريمة مسح الجرافيتى الذى حكى حكاية ثورة وخلد شهداءها الورد اللى فتح فى جناين مصر فى شارع محمد محمود.. وغالبا حايطلع المتسبب هو منظمة الياكوزا اليابانية، التى تضاهى المافيا الصقلية.. أهو.. اخترعنالكوا طرف تالت يضرب نخنوخ على عينه ويقوله قوم وانا أقعد مطرحك.. ■ تصريح للسيد خيرت الشاطر يتم تداوله على جميع المواقع يقول «شهداء الثورة كلهم من الإخوان والتاريخ بيننا».. يعنى مثلا مينا دانيال، وكريستين، ومريم مكرم نظير، ومهير زكى خليل، وموسى زكى قطب، ومينا إسطفانوس نصرالله، ومينا لمعى بباوى، ومينا نبيل هلال، ويوسف فايز ارمانيوس، ومايكل وصفى أبادير، وجرجس لمعى موسى، وفايز فهيم السيد، وجرجس إسطفانوس، وجرجس صابر، وفؤاد سليمان أسعد عبدالملاك وغيرهم - طبقا لقوائم الشهداء المنشورة فى كل مكان - أعضاء فى الإخوان!!.. طب والله كويس قوى.. ويا ترى صرفوا معاشات من الجماعة تليق بعضوية مواطنين مسيحيين فى الإخوان المسلمين استشهدوا فداء للوطن؟؟.. وعملتولهم جنازات وكده؟؟.. هايل.. سؤال زؤنن بقى: مسحتوا صورهم ليه من على حائط محمد محمود؟؟.. آه افتكرت.. دى الياكوزا.. عذرا على هذا الخطأ.. ■ حزورة صغيورة.. اللعبة دايما بتبقى بين واحد كهين.. وواحد أهبل.. والهدف واحد بريالة مسبل قفاه للسك.. الكهين يفهم الأهبل إنهم الاتنين حبايب وكفاءة.. والأهبل يصدق.. يقوم الكهين يوسع قوى للاهبل عشان يستعرض هبله وهو فاهم إنه كده بقى سلطة وحياخد حتة م التورتة.. والكهين يعمل نفسه برىء وضحية.. والجايزة إن اللى بريالة ومسبل قفاه للسك يشوف الاتنين قدامه يقوم يقول فى عقل باله «نار الكهين ولا جنة الأهبل».. ويختار الكهين.. السؤال بقى: مين يا حلوين اللى بياخد على قفاه؟؟.. الأهبل ولاَّ اللى بريالة؟؟؟؟؟؟؟؟؟؟؟؟؟؟ ■ يعنى ينفع كده؟؟.. ينفع ناس كباره تقعد تقول كلام وإثباتات وأدلة ويطلعوا مستندات فى برامج واجتماعات وخلافه عشان يثبتوا وجهة نظرهم ويؤكدوا صحة تصرفاتهم فى قضية الخناقة على جامعة النيل وزويل.. والعيال الصغيرة فاقسة كل حاجة؟؟ ■ عيب الجيل الكبير إنه مش مقدر ذكاء العيال وقدرتهم على كشف الحقائق.. فاكر إنه لسه يقدر يسرح بيهم زى زمان.. الكذب فى هذا العصر أصبح مالوش لا رجلين ولا حتى مقعدة.. ■ العيال جمعوا أدلة تثبت عدم صحة كل ما يقال عن ترتيب الأحداث فى قصة تنازل مجلس أمناء الجامعة عن حق الانتفاع وتوقيته واسترداد الفريق شفيق للجامعة وردها لمجلس تطوير التعليم فى ١٧ فبراير ٢٠١١.. وزعم د. زويل أن كل هذا حدث دون أن يكون طرفا فيه وأنه لم يعلم عن هذا الموضوع إلا فى شهر مايو، بناء على حديث مع شفيق اللى كان مشى م الوزارة.. أثبتوا تفاصيل كثيرة تثبت صحة ادعائهم وموجودة الوثائق على النت.. ■ وفى كل الأحوال.. عيب قوى نقفل جامعة شغالة وبها طلبة وأبحاث لصالح جامعة لسه ع الورق.. عيب قوى نضع الطلبة أمام خيار إنهم يعتصموا دفاعا عن جامعتهم وكمان نخش عليهم بالقوة الغاشمة نضربهم ونستعرض معاهم فنون التعامل مع البلطجية.. عيب قوى لما تبقى المساحات واسعة شاسعة ونضيق على نفسنا.. عيب قوى يبقى منظرنا كده قدام العالم!! للمرة المليون نتفنن فى فضيحة أنفسنا وإلحاق العار بها.. إيه الغشومية دى؟؟.. ما أسهل الحل.. اعملوا جامعة تانية يا أحباب الله.. داحنا فى عرض فصل أو دكة.. لا أسكت الله لك حسا يا دكتور زويل.. تخيل لو كان اللى بيحصل ده حصل فى جامعتك إنت.. هل الاشتراك فى هذه الفضيحة يؤهل اى أحد لنيل الدكتوراه أو نوبل؟؟؟؟؟ ■ اليوم نحتفل بالمؤتمر التأسيسى للتيار الشعبى المصرى فى ميدان عابدين الساعة الثامنة مساء.. أتمنى أن يحضر كل من يريد أن يفهم حقيقة هذا التيار بعيدا عن الشائعات والنقد الحلمنتيشى الذى يدمنه البعض من خلف شاشات الكمبيوتر.. أن يندمج مع جموع المهمومين بمستقبل هذا الوطن ويتخلص من شكواه بالعجز والحيرة واليأس.. والجو حايبقى حلو وحانغنى سوا كمان.. قوموا بقى بلاش أنتخه.. ■ نفسى أنضم للصفوة واتعين محافظ بقى.. مسوغات التعيين جاهزة.. بيجامة كستور دبلان مخططة معدة خصيصا للزيارات الميدانية..