رسالة للعم أوباما بقلم إسعاد يونس ٢٢/ ٣/ ٢٠١٣ بالمصرى اليوم

■ كل سنة وانتى طيبة يامه.. يا أماتى.. يا مولاتى.. يا تاج راسى.. يا مصر. ■ تمسكاً بحبة اللطافة السارية مع عيد الأم.. أستطيع أن أقول الحمد لله.. رغم كل الضنك والضنا اللى إحنا فيه إلا أنه من المؤكد أننا خرجنا بنتيجة محققة، وهى أن الاسلام براءة م العالم دى.. جملة قديمة لكن اتأكدت بشراسة وشدة فى هذه الآونة الأخيرة.. خلاص كده.. اللى حايقرنلى الإسلام بالناس دى حاريّح كوعى ف خيشومه.. ثانياً الحمد لله إن الهيلمان وقع والأسطورة اتفسئت.. وماعادش حد حايسرح بينا ويعمل نفسه قال الواد تنظيم سرى ومنظم والحبتين دول. كده خلاص.. البطيخة اتفتحت وبانت قرعة وواخدة حقن ميه حتى ماتنفعش تتخلل. ■ الكلام ده تروحوا تاكلوا بيه عيش فى دول تانية م اللى خلاياكوا مبرطعة فيها ولا تتمتع بكل هذا الرصيد والإرث الحضارى الملازم للجينات.. ويمكن العيب فينا.. بندى على هبل فى الأول وظروفنا المعيشية السيئة بتنضح على مناظرنا.. لكن هما كام شهر وبنفوق ونكتشف الحقيقة.. ماهو شعب بكل هذا الزخم من الفلسفة والسخرية صعب تسرح بيه كتير.. لدينا تراث قديم.. نحن الذين أطلقنا على أنفسنا عبارات مثل.. إحنا اللى دهنا الهوا دوكو.. عرّقنا السمكة فى الميه، ونفّدنا الفيل من خرم الإبرة.. شعب يصف نفسه فى عبارات ساخرة من ييجى عشرين تلاتين سنة.. كان هذا قبل أن نقتحم عالم النت وتتفتح مداركنا مع هذه الثورة.. فحدث طوفان من المعرفة المصحوبة بسخرية لاذعة.. وفقسناكوا الفقسة التى لا عودة منها.. تروحوا فين يا غلابة إنتوا مننا؟! ■ إن استعراض قائمة الخيابات قد يأخذ منا شهوراً.. المشكلة ليست فى استعراض القائمة ولكنها فى المتهمين بارتكابها.. يبدون لنا فى حالة استهبال واستنطاع لا نهائية.. ولكن الواقع أنهم مزنوقين.. وإحنا فى عُرفنا إن الواحد كل ما يتزنق يعمل إيه؟؟.. يقلع.. فإنتوا كل ما تتزنقوا بتقلعوا ماسك من الماسكات.. وشعر دقونكوا بينحِل لوحده.. ولكنكم لا تريدون مواجهة الواقع.. عاملين زى العيل الرزل اللى كل ما يتقاله ذاكر والا كُل.. يسد ودانه ويغمض عينيه ويزعق عشان يسور نفسه بصوته هو بس.. طب العيل ده آخرته إيه؟؟.. بيترن علقة موت.. فنصحى للون بقى. ■ نما إلى علمنا أن هناك فى هذا التنظيم اللى فستكته هيئة مفوضى الدولة فاستعجل وضرب إشهار عالسريع كده عبال ما يلاقيله عدلة.. أنه يصدر فى كل صباح تعليمات إلى تابعيه بالنشيد اللى حايغنوه النهاردة.. فإذا ما ساقك حظك البايخ إلى أن تتورط فى مناقشة مع حد فيهم حاتلاقيه قلب على أسطوانة مشروخة أو منبه زراره بايظ وردد نفس الكلام اللى بيقوله زميله من غير ما يسمع إنت بتقول إيه أصلاً «وانا مالى ما هو اللى قاللى.. واحنا مالنا ده مبارك ونظامه.. منه لله المجلس العسكرى هو اللى عملها مش احنا.. وهما إيه اللى وداهم؟؟ أصلهم استفزونا بالكلام الكذر والتلميحات الكذرة اللى رسموها عالأرض.. ده قاعد علشانكم.. بالكم لو مشى مفيش واحد حايقعد أسبوع مكانه».. مونولوج بيحفظوه فى البيت ويسمّعوه لبعض ثم ينطلقوا، تدوس عالزرار يطلعلك التسجيل، وانا مالى ما هو اللى قاللى............ طب بالنوسبة للجملة الأخيرة.. إنتوا بس قولوله يتوكل على الله واحنا حنصطفل.. ■ محكمة الجنايات تلغى التحفظ على أموال ٢٣ رجل أعمال متهمين بالتلاعب فى البورصة.. يانهار أزرق عالكبسة.. بتحطوا نفسكوا فى مواقف بايخة.. إنتوا مابتعملوش حاجة صح خالص؟؟.. كله معيوب كده؟؟.. هو إنتوا فاكرين إن واحد زى عبدالرحمن الشربتلى ده مثلاً قاعد عندنا وبيستثمر كل الاستثمارات المهولة دى من تلاتين سنة عشان إيه؟؟.. الدنيا قافلة فى وشه والدول مابتبوسش رجله يروح يستثمر فيها؟؟.. والا عشان بيحب البلد دى وبيرتاح للناس والعشرة والبركة اللى كانت فيها؟؟.. هل تعتقدوا إنه مستعد يتحمل إساءة سمعة عالفاضى كده ويجرى يحب على إيديكوا ويقولكوا والنبى خلونى معاكوا؟؟.. وإن كنتوا طمعانين فى مشاريعى خدوها أو ادخلوا معايا شركا من غير ما تدفعوا حاجة عشان أعيش فى أمان؟؟.. لأ.. خالص.. آبسلولتلى.. ده ممكن يولع فى الحاجة ويغور لو حاتقرفوه فى عيشته.. مش حايبقى أحسن من اللى هجّوا وغاروا غير نادمين ولا آسفين.. كفاية إنهم فارقوكوا وفارقوا نحسكوا.. فى الأول وفى الآخر هو مش مضطر لإنه مش مصرى والدنيا حاتفتحله أحضانها.. صدق اللى قال عريان المش عارف إيه يعمل إيه!! ■ الأستاذ صفوت حجازى والإخوة اللى رايحين جايين على غزة أكتر ما بيناموا فى بيوتهم.. والنبى مانت راجع من هناك يا شيخ.. وخد إخواتك معاك.. دانت خلاص بينك وبين القدس فركة كعب.. قطعت نص الطريق.. كمِّل بقى.. على الأقل توفر التلات أرغفة والخمسة لتر بنزين.. ■ لا بس والله براوة.. لأ طقم ما شاء الله ميلامين ميلامين يعنى.. يشرّف الحقيقة.. إن كان من رئيس الوزرا لوزير العدل للنائب العام لوزير الداخلية لوزير الإعلام لوزير التعليم للمتحدثين الرسميين لمساعدين الرئيس اللى كل واحد فيهم عليه كل عكة وعكة للمستشارين اللى بيحضروا الخطابات.. لطرزان إنسان الغاب اللى كل ما يحتاسوا يدوله حقنة شجاعة ويقوم خابطله مؤتمر يصرح فيه بتصريحات عنترية تتعارض تماماً مع وجع الركب وضياع الشاحن.. لا شلة بصراحة تغرق قارة مش بلد بس.. ده غير مزارع تسمين العجول فى منطقة المقطم اللى بيعلفوا فيها جتت منزوعة المخ والرجولة.. حاجة تخلى الواحد يقول للعالم المتحضر.. مصرى وأنتحر مش أفتخر. ■ صحيح أحمد دومة رُفيّع وسُفيّف ولو نفخت فيه يطير، لكن سبحان الله عنده مخزون جينات رجولة وشجاعة يصعب على التيران اللى طالوه هو وزميلته الحصول على ذرة منها.. ومش حانعملكوا حملة تبرع بالرجولة.. خليكوا زى الخس النىّ كده. ■ الناس مقامات بقى معلش، والمقامات لا علاقة لها بمستوى المعيشة، ف ياما فلاسفة وشحاتين، وياما أصحاب رأى وصناع حضارة ومش لاقيين ياكلوا، لكن هذا المستوى الوضيع بيئياً وحضارياً ومعلوماتياً ماينفعش كان يحتل مساحات م الإعلام حتى بغرض حرقه، ده حتى الحرق له مواصفات، يعنى ينفع يتقال عليه شيخ ويقعد يفتى ويتكلم ويهدد ويحشد كائن زى اللى ابنه مطلوب فى جريمة قتل شاب فى شبرا ده؟؟.. من استمع إلى المكالمة الهاتفية للولد مع عمرو أديب واطلع على صوره المنتشرة على الوسائط يستطيع أن يلمس بمنتهى الوضوح انحدار المستوى واللغة والبرشمة ودفتر الأحوال الملغمط، ثم يطلع والده علينا فى الإعلام مستضافاً قال فى برنامج تنويرى دعوى يقولك الشريعة دى دين أمك، ولقينا فى خيم الاتحادية لوالب وغسول مهبلى والهطرفة دى، فيه حد أدنى لمستوى البشر، حتى لا يستغل هذا الظهور فيعمل فيها زعيم ويوجه أوامر للتكاتك بالاستعداد للهجوم على القسم اللى حايرحلوه عليه، ويحاول كالعادة يخلق قضية فتنة طائفية من حادث ابنه عشان يطرمخ عالموضوع.. يا أخى كل البشر يذهبون إلى دورة المياه ليتركوا هناك أشياء ويشدوا عليها السيفون، دول بس اللى بياخدوها معاهم وهما خارجين ويتمنظروا بيها، إيه أم القرف ده؟؟؟؟؟؟؟؟؟ ■ رسالة للعم أوباما.. على فكرة انت بتستعبط.. عليا الطلاج بتستعبط.. وعامللى فيها سى آى إيه وإف بى آى وكولومبو ورامبو وميشن إيمبوسيبل.. وانت مش فاهم ولا كلمة عن شعب مصر.. ولا عارف إيه اللى بيحصل ولا نيلة.. شغال استهبال زى حبايبنا.. هو لازم تتدخلوا فى شؤون الشعوب وخلاص؟؟.. الكارثة إنكم عمركم ما حلّيتوا على بلد إلا لما خربتوها.. ولا دخلتوا حرب إلا وخسرتوها.. هو لازم تتفق علينا مع حكامنا وخلاص؟؟.. كل ده عشان الدولة المعفنة اللى مايحصّلش تعدادها سكان عزبة علام اللى اسمها إسرائيل؟؟.. طب ما تيجى تقعد معانا إحنا الشعب.. والله حانحييك ونسنجفك ونشربك أحلى شاى بالياسمين.. إنت بس ابعتلنا كام واحد من المن إن بلاك بتوعك واحنا حانوجب معاهم بالأصول.. أصلك بتراهن غلط ومُصرّ تنشن وانت أحول.. وبتدعم ناس ضايعة وبيضيعونا معاهم.. ده إيه المُرّ بزيادة ده؟؟